Memorijalna izložba „Mila Moškov - Dobrotska čipka“, svjedočanstvo o njenom stvaralaštvu i doprinosu jednog od najprepoznatljivijih simbola kulturne baštine Boke kotorske je postavljena od 21. 7. do 31. 7., u galeriji Artro u Luštica Bay-u. Program sjećanja i radionicu pod inspiracijom istog motiva, vodit će Milina učenica Slađana Vučetić, 30. 7.
Milino ime ostat će neraskidivo povezano s Dobrotskom čipkom, drevnom tehnikom koja nije samo izraz izuzetne estetske vrijednosti, već i svjedočanstvo povijesti, identiteta i života žena ovog prostora. Dobrotska čipka predstavlja ono što suvremena teorija kulturnog nasljeđa prepoznaje kao živo nematerijalno nasljeđe, znanje koje postoji samo dok se prenosi, dok ga neko podučava, uči, izvodi i čuva.
„Upravo u tome je bila veličina Milinog rada. Bila je nositeljka znanja, čuvarica jednog kulturnog koda i osoba koja je razumjela da se tradicija ne čuva zatvaranjem u prošlost, već dijeljenjem sa drugima. Svojim radom i predanošću omogućila je da vještina koja pripada višestoljetnoj istoriji Boke dobije novu budućnost. Tokom prethodne godine Mila Moškov je na Luštici Bay održala tri radionice Dobrotske čipke, gdje je svojim znanjem, strpljenjem i toplinom okupila brojne učesnike. Reakcije su bile izuzetne – oduševljenje posjetilaca bilo je ogromno, jer su imali rijetku priliku da neposredno upoznaju ne samo tehniku izrade, već i priču, emociju i istoriju koja stoji iza svakog boda. Mila je do posljednjih dana ostala posvećena svojoj misiji. Planirala je nove aktivnosti, nove susrete i nastavak sradionica, vjerujući da znanje mora nastaviti da živi. Njena energija, predanost i želja da svoje nasljeđe podijeli sa drugima ostaju jedan od najdragocjenijih doprinosa zajednici, ističe Kristina Kerstner, vlasnica i kreativna direktorica galerije Artro u Luštica Bay-u.
Poseban trenutak u njenom posljednjem periodu stvaralaštva bilo je predstavljanje njenih radova u okviru Cultural Corner programa na otvaranju Mamula Island, gdje su njeni čipkani radovi bili dio kulturnog mozaika, koji je predstavio vrijednosti i autentičnost ovog prostora.
„Njena povezanost sa Lušticom nosi posebnu simboliku. Mila je bila Luštičanka, žena ovog kraja, čije je djelovanje pokazalo da kulturne granice ne postoje tamo gdje postoje ljudi koji baštine, vole i prenose vrijednosti svog prostora. Boka je kroz vijekove bila mjesto susreta različitih kultura, a upravo ljudi poput Mile čuvali su njen najdragocjeniji sloj, ljudsko znanje i sjećanje. Zato se Luštica sada ne oprašta od Mile Moškov samo izložbom. Oprašta se načinom na koji bi ona sama željela, kroz nastavak rada, kroz učenje i kroz dijeljenje“, dodaje Kerstnerova.
U znak zahvalnosti za njen doprinos, na svjetioniku Luštica Bay-a 30. 7., bit će projektiran jedan od radova Mile Moškov kao simbol sjećanja na umjetnicu. Istovremeno, potvrđuje opredjeljenje Luštica Bay-a i ARTRO galerije da kroz Feel. Alive filozofiju nastave da njeguju lokalnu baštinu, umjetnike i znanja koja oblikuju identitet ovog prostora.
Program
21.7. – 31. 7.| Artro galerija, Luštica Bay
Izložba „Mila Moškov - Dobrotska čipka“
30. 7.| Luštica Bay
Projekcija rada Mile Moškov na svjetioniku.
Radionicu Dobrotske čipke vodi Slađana Vučetić, učenica škole Mile Moškov.
Radno vrijeme galerije: radnim danima od 16 do 21 h.